【Emily】機場新智能安檢 林世雄飲頭啖湯

【明報專訊】機場新智能安檢系統噚日起分階段啟用，新系統有360度分析行李內部結構功能，旅客唔使再特登喺行李攞電子產品同液體出嚟分開過機檢查。運輸及物流局噚日喺facebook上載片段，話局長林世雄噚日出發去東京公幹時都有試用新系統，片中見到局長行裝輕便，只係得部手提電腦、一個充電寶同一支酒精搓手液，局長試用完後大讚系統輕鬆快捷。

片段紀錄咗局長成個過安檢程序，佢將電腦、充電寶同搓手液放入一個灰色手提電腦袋，將個袋放喺輸送帶上嘅托盤後，就向前行通過金屬探測拱門，然後嚟到新增嘅「人體全身掃描器」面前企定定，由儀器探測身上物品，通過後就繼續向前行，攞番托盤入面嘅嘢。旅客如果遺留物品，系統亦會發聲響提示。

目前機場南北離境大堂已安裝4條新通道用新系統，兩年內會分階段全面更換新系統，局方預計日後手提行李處理量可提升兩成。