【Emily】李家超周日去四川睇來港熊貓 中大民調 特首3司長評分升未及格

【明報專訊】特首李家超同夫人李林麗嬋應四川省政府邀請，聽日會啓程訪問四川，商討同了解中央送畀香港特區嘅一對大熊貓來港安排，相信到時仲會見到即將來港嘅兩隻大熊貓。根據政府公布，李家超一行人將會去中國大熊貓保護研究中心都江堰基地，喺四川期間，李家超亦會同四川省領導會面，並參觀當地設施。

李家超喺新聞公布表示感謝四川省政府重視送贈大熊貓畀香港嘅安排，「為表示隆而重之，我和太太將親自到四川。我會細心商討和了解迎接香港大家庭的兩位新成員的準備工作；特區政府會全力做好迎接大熊貓的安排」。文體旅局長楊潤雄、漁護署長黎堅明同海洋公園代表亦會隨行。

另外，中大香港亞太研究所喺5月28日至6月24日訪問705人，結果顯示，今年5月份特首李家超同3個司長嘅表現評分都比今年3月時上升，不過都仲未過及格線（50分）。市民對李家超嘅表現評分係49.9，比3月升5.3分；政務司長陳國基、財政司長陳茂波同律政司長林定國嘅表現評分，分別係45.7、48.6、45.4，各自比3月升約4分。