【Emily】多啦A夢無人機騷7‧20再搞

【明報專訊】早前喺維港舉行嘅多啦A夢無人機匯演，吸引唔少人去湊熱鬧，主辦單位ARR計劃喺7月20日（周六）搞多場，今次會移師星光大道近尖東海域上空舉行，並加入新內容。主辦單位話，由於上次觀賞人數眾多，到時有部分星光大道會分成不同嘅免費戶外展區，並實施單向人流管制，參觀者須由指定入口進入。

另外，主辦單位下周六（13日）開始舉辦《100%多啦A夢&FRIENDS》巡迴特展，想去同12米高嘅吹氣多啦A夢「打卡」同參觀展區嘅市民，就要由下周二（9日）起透過Klook系統預約。由於今次實施單向人流管制，屆時只限已預約或已購買收費展區門票嘅市民進入展區範圍，主辦單位建議提早到場，並預留30分鐘辦理入場手續。