【Emily】的士小巴會「鷹派」卸任？ 新理事長：冇所謂溫和派同激進派

【明報專訊】近年每逢同的士有關嘅議題，不時都會見到香港的士小巴商總會代表周國強出嚟發表意見，唔少言論都令公眾印象深刻。商會今個月換屆，已連任兩屆理事長嘅周國強按規定要卸任，新一屆理事會名單近日出爐，Emily發現唔少前朝理事都重返理事會，理事長一職由喺千禧年代做過理事長嘅陳洲擔任。

之前有傳媒報道新任理事會屬「溫和派」，作風同被視為「鷹派」嘅周國強唔同。陳洲噚日就同Emily講，商總會冇所謂嘅溫和派同激進派兩派，大家會繼續竭力為的士業界爭取應得利益，新一屆理事今個月1號正式上任，之後會慢慢同大家認識。

卸任自動成會長 周國強新職待更新

的士小巴商總會內部規定，卸任理事長會自動成為會長，不過Emily噚日上佢個網頁，見到理事長名單已更新，唯獨會長一列見唔到周國強嘅名。陳洲對此亦向Emily澄清，只係未趕及更新資料，希望大家畀少少時間更新。周國強就同Emily講無所謂，又預告將來自己會有新方向，繼續喺唔同崗位為的士業發聲，又話喺咩新崗位咩位置都唔重要，最緊要幫到的士業改革。