【Emily】武林×舞林 文化中心今起千人匯演3日

【明報專訊】搞活動好多時要諗噱頭，武術crossover舞蹈唔知大家覺得點？有團體會喺今日（9日）至14日一連6天喺尖沙嘴香港文化中心搞「武林盛舞嘉年華」，頭炮活動係千人武藝操，一連3日朝早10點舉行3個唔同主題嘅「千人武術操」大匯演，今日主題係武藝操，聽日係雙節棍，第三日係太極拳。

嘉年華獲政府「文化藝術盛事基金」資助，話係慶回歸27周年活動，雲集國內外近3000名武術及舞蹈界人士參與。嘉年華仲會有超過60場中華文藝盛典表演。Emily見到有一項叫「功夫寶貝」嘅活動，由10幾間幼稚園嘅學童集體表演武術，仲話節目糅合武術、舞蹈、音樂等元素，話可展現學童萌萌可愛一面。

嘉年華部分活動需購票，包括閉幕節目「盛舞之夜」，屆時會有香港、內地舞蹈團、舞蹈家及武術家同台演出，話畀大家感受匯聚舞（武）者嘅激情。活動詳情可瀏覽網址（www.kungfu-dance.com.hk）。