【Emily】方力申鬧泳總 張欣宇#楊潤雄：小圈子令人窒息

【明報專訊】前游泳港隊代表方力申開辦嘅泳會旗下學生，因泳會級別而不能參加錦標賽，公開咆哮不滿，方力申仲話多次聯絡泳總不獲回應。香港新方向議員張欣宇（Gary）噚日喺facebook分享事件話，「是可忍，孰不可忍…呢種小圈子固化藩籬真係令人感到窒息，楊局長，是時候改變了」，Gary仲標籤埋身在四川嘅文體旅局長楊潤雄?。文體旅局發言人回覆Emily話，已向港協暨奧委會表達對事件嘅關注。

文體旅局：已向港協表達關注

新民黨立法會議員何敬康（Adrian）噚日就去信泳總會長王敏超要求解釋，有否開會討論事件、泳手受所屬泳會級別限制參賽資格嘅原因等，其後Adrian喺facebook表示，王敏超答應短期內召開會議，與佢、方力申一齊商討解決辦法。

Adrian亦去信立法會民政及文化體育事務委員會，要求討論檢視泳總管理下，泳手嘅比賽資格及選拔制度，並要求泳總同文體旅局等部門派代表出席。文體旅局發言人回覆Emily話，已向港協暨奧委會表達對事件嘅關注，局方就事件會同該會保持溝通，又話明白唔同體育總會就其舉辦嘅賽事有不同資格及規則，局方認為有關制度應定期檢討，確保公平。