【Emily】運動消閒博覽 體院邀市民砌打氣牆 撐港隊迎巴黎奧運

【明報專訊】香港書展、香港運動消閒博覽及零食世界3項展覽會於7月17至23日喺灣仔會展舉行，今年運動消閒博覽亦乘住巴黎奧運熱潮，展出包括港隊花劍手張家朗著過嘅劍擊金屬電衣、運動鞋，以及泳手何詩蓓嘅泳衣及泳帽等物品。

香港體育學院社區關係經理曾韻雯話，為咗同巴黎奧運和殘奧會嘅香港運動員打氣，體院會喺展攤內設即影即有裝置，市民可手持打氣字句影相，為運動員送上祝福，合力砌出大型馬賽克打氣牆，打氣牆稍後會放置於體院，畀運動員感受市民嘅支持。展覽同時會展出7塊香港運動員喺大型運動會獲得嘅獎牌，以及12名運動員嘅訓練及出賽裝備。

博覽會有唔同類型嘅產品及活動介紹，包括推介近年人氣攀升嘅運動項目匹克球，場內仲有繩網飛索體驗等活動。