【Emily】桃園律師公會訪港 話旅警升唔阻交流

【明報專訊】近年兩岸關係麻麻，但民間交流就繼續。台灣桃園律師公會理事會一行6人近日組團訪港，見咗香港律師會領導層，雙方又簽咗合作備忘錄。桃園律師公會理事長張百欣律師同Emily講，今次係公會首次組團來港，感受到香港朋友嘅熱情，期待喺桃園盡地主之誼，接待香港同行。

與律師會簽合作 唔算「非必要旅遊」

台灣當局早前提升內地同港澳旅遊警示至橙色「避免非必要旅行」。張百欣話舊年已經籌備嚟香港，而且簽合作備忘錄對兩個會都有重要意義，今次唔算「非必要旅遊」，所以照原定計劃嚟香港。

香港律師會喺社交網站話，雙方就兩地法律界概况及香港情况交流，會上都有「澄清對國家安全法例的誤解」。律師會會長湯文龍話期待同桃園律師公會合作，為青年律師及學生合辦課程同活動。

張百欣話今次交流主要焦點係兩地律師未來合作深化、訴訟外解決紛爭機制，以及青年法治教育推廣。佢話《國安法》同《基本法》並唔係雙方交流討論嘅重點，所以唔特別評論喇。