【Emily】突破書誌成本飈 下年4月最後一期

【明報專訊】基督教青年機構「突破」旗下，自2009年出版嘅《Breakazine突破書誌》噚日宣布，下年4月後停止出版，書誌網頁同社交平台噚日貼出聲明話，作為一本實體印刷嘅期刊，近年製作成本不斷飈升、加上讀者閱讀方式等外在環境轉變，導致經營困難，為咗更適切年輕人嘅需要，編輯團隊覺得需要空間再作部署，於是決定停刊。

突破書誌喺facebook專頁話，當初出版係為咗回應通識科及價值教育，關切青年及文化議題，至今出版咗15年。翻查突破機構嘅網頁，書誌係機構出版及媒體事工之一，強調求問嘅學習精神，定位為圖書與雜誌嘅混合體。

書誌話現時會繼續運作，不過會稍為調整出版時間，第78期今年底推出，最後嘅第79期會喺明年4月出版，內容會回顧創刊以來多年嘅事工。