【Emily】請油天三子遊埠 港航：製造快樂係本分

【明報專訊】喺升中放榜日展現率真可愛反應、油蔴地天主教小學（海泓道）3個男生嘅受訪片段連日喺網上熱傳，商業機構都藉事件宣傳。香港航空噚日喺facebook出帖話要「尋人」，想獎勵3個咁努力嘅同學仔，會送機票請佢哋同屋企人去旅行，地點任揀，又話會包埋一行人嘅行李費。

來自「新油天」嘅小六生陳同學考入九龍華仁，佢日前受訪提到周一至周五放學後都要補習，在旁嘅江同學立即「Ｏ嘴」，幾個男仔嘅反應惹笑，片段熱傳。香港航空出帖時引用陳同學訪問時提過嘅學習心得，「雖然讀書講辛苦真係談唔上」，話如果同學仔或家長見到帖文，可以盡快聯絡港航，又話「讀書係你哋嘅本份，為你哋製造快樂回憶都係我哋本份」。

另外，匯豐銀行前日喺總行大廈嘉許284個來自全港20間大學及高等院校嘅學生。匯豐話6個旗艦獎學金過去59年共支持7200個學生。