【Emily】羅淑佩忙裏偷「行」多啦A夢展

【明報專訊】多啦A夢展覽今日開鑼，噚日有優先場招待VIP，Emily在場唔單止見到一頭銀髮著旗袍嘅羅蘭姐睇雕塑，仲見到房屋署長羅淑佩，原來佢唔止係Hellosss（MIRROR成員陳卓賢嘅粉絲），仲係多啦A夢資深擁躉。

話說噚日下晝房委會開大會，羅淑佩忙裏偷閒，趁午飯時間到展場，Emily見佢不停用手機影相，好鬼雀躍。Emily同佢打招呼，佢好開心咁話好喜歡多啦A夢，仲即時展示手機，話自己連手機殼都係多啦A夢公仔。佢話由細到大都好鍾意多啦A夢，曾經擁有一整套多啦A夢（當年叫「叮噹」）漫畫，之後佢送咗套書畀朋友嘅孩子，?家諗起仲有啲唔捨得。

睇完展覽，羅署長急急行去精品售賣區血拼，好快就揀定唔少多啦A夢產品，Emily見到一隻多啦A夢大公仔，仲有好多，佢拎銀包出嚟，二話不說就畀錢買晒。