經濟
雷軍問有冇人用iPhone Mini 疑為細機調研
【明報專訊】小米（1810）創辦人、雷軍星期四晚喺微博發文問：「還有人在用iPhone Mini嗎？」，又邀請小屏手機愛好者留言交流，第二個post又問：「美麗小廢物？」，引起唔少討論。有網民認為，雷軍好有可能係為小米小尺寸旗艦手機做民意調查，甚至有機會推出小尺寸摺機。
睇返網民留言，唔少人都希望小米可以推出細屏幕手提電話，有女性用家認為「小螢幕真的對小手女生很友好，太大的手機真的拿不住，手指巨累」，唔知雷總又會唔會順應民意推出小尺寸手機呢？其實蘋果（美：AAPL）過去曾發表兩款Mini機型，包括iPhone12 Mini和iPhone13 Mini。相比起標準版手機，Mini版本價格平啲，但電池容量相對較低，因此續航力唔係咁理想。此外，Mini版本硬體成本相對較高，亦可能係蘋果唔再推出Mini版本iPhone原因之一。
