【Emily】消委北角office裝修完 會議室名「有水有木」

【明報專訊】消委會趁今年50周年大裝修北角嘅辦公室，上個月完工，噚日每月一度嘅《選擇》月刊發布會正式回歸北角。消委會總幹事黃鳳嫺（Gilly）帶Emily行咗一轉，新office以大地色系為主調，會議室亦闊落咗好多，仲用埋天花板收音，記者提問唔使再對住個咪。Gilly話新會議室比之前大咗25%，每間會議室用咗唔同名稱，寓意深長。

黃鳳嫺話，新office成個設計同大自然有關，每間會議室都有唔同名，例如「瀚洋」代表「諗嘢又要闊又要深」，構思寬闊如大海、無邊際嘅思考；而「茂林」就代表人才，「樹林係一個team嚟」；亦有其他房間代表高瞻遠矚、無限創意、天馬行空。

新office有唔少「打卡位」，喺會議室外面有隻消委會吉祥物「招財幸運金豬」，喺消委會50周年酒會已經登場，上面有特首李家超嘅簽名。Gilly話度身訂做咗一批牆紙，上面印咗好多消委會做過測試物品嘅英文名，例如杯麵等，同埋一啲消費權益價值觀嘅字句。