【Emily】青協全健大樓啟用 料年服務1.5萬人

【明報專訊】位於深水埗、由香港青年協會成立嘅青協全健綜合大樓噚日投入服務，為35歲或以下嘅人提供健康管理服務，同埋培育推廣健康人才，希望減低醫療系統負擔，預計每年服務約1.5萬人。青年亦可以趁大樓開放去體驗人工智能情緒藝術系統、運動測研館等設施。

青協督導主任陳英杰話，大樓引入英國嘅「社會處方」健康管理方針，透過醫社合作處理青年常見健康問題，例如肥胖、情緒困擾同運動創傷。佢又話青年可以去大樓睇私家醫生，制定6個月嘅個人健康計劃，再由受訓推廣全人健康嘅「全健師」每月跟進，盛惠1200元，6至15歲領取書簿津貼學童就免費。

出席大樓開幕禮嘅行政會議成員、精神健康諮詢委員會主席林正財話，好欣賞青協培訓推廣健康人才，期待佢哋喺唔同場合都可以向人推廣健康生活。