Emily Online | 2024年亞洲50最佳酒吧 港連續第四年奪冠 (19:01)

香港夜生活少不免有飲酒消遣，2024年「亞洲50最佳酒吧」噚日（16日）喺旅發局支持下第二年來港舉行，香港酒吧更連續第四年奪冠。今年贏家係首次上榜、位於中環必列者士街嘅Bar Leone，酒吧代表Lorenzo Antinori話，香港酒吧文化多元、充滿競爭力，過去幾年有多間特色酒吧開業，自己好榮幸亦非常驕傲成為其中一員。

香港今年共有9間酒吧打入亞洲50大名單，其中4間更入選10大，除咗Bar Leone外，仲包括分別排名第四、第九同第十嘅Coa、Argo同The Aubrey。旅發局今年亦首次與主辦方合邀10幾間國際知名同本地得獎酒吧，由24名調酒師舉行5場唔同主題嘅期間限定雞尾酒體驗活動，畀市民旅客參與。旅發局都喺官網製作咗全新酒吧地圖，列載過去5年打入亞洲50大嘅本地酒吧。

另外，旅發局噚日同「50最佳」（50 Best）簽訂3年合作計劃。旅發局總幹事程鼎一話，未來會主辦更多美酒佳餚相關嘅「50最佳」頒獎禮。