【Emily】猜包剪揼或性擾騷海報 市民唔明 平機會解畫：簡單遊戲都可能涉冒犯

【明報專訊】近日網上流傳一張平機會海報，海報上有「包、剪、揼」圖案，同埋「這遊戲有可能是性騷擾」中英文字句，好多網民都話唔明白兩者關係。Emily向平機會查詢，平機會解釋，唔係話呢個遊戲等同性騷擾，而係想表達即使簡單不過嘅遊戲，一旦牽涉性嘅元素，就有可能構成對他人冒犯、侮辱或威嚇等不受歡迎行為，即係違法嘅性騷擾行為，提醒學生唔好掉以輕心。

原畀大專用 盼喚同學探討

海報以藍色為背景，最底印咗平機會同旗下反性騷擾資源平台logo。平機會話，海報係今年6月推出畀大專院校用，海報設計以遊戲為主題，主要係考慮到唔少學生活動，特別係迎新活動都以遊戲作為主軸模式，根據會方2019年發布嘅《打破沉默：本港大學生性騷擾調查研究》，遊戲係大學生較常遭遇性騷擾嘅形式之一。

平機會又話，希望海報可以喚起同學對性騷擾問題嘅探討，例如積極參與平機會與大專院校合作製作嘅反性騷擾網上培訓課程；亦可掃描海報上嘅QR code，去平機會反性騷擾網上資源平台，報名參與認識性騷擾網上學習平台。