【Emily】立會議員歡送 陳維安引《繁花》台詞「上台終有下台時」

【明報專訊】擔任立法會秘書長12年嘅陳維安（Kenneth）即將退休，今個月底「last day」。由於噚日係立法會休會前最後一次大會會議，亦係Kenneth退休前最後一次參與嘅會議，一眾議員就為佢舉行小型歡送會，仲準備咗啤酒一齊「啤一啤」 。

選委界別議員尚海龍話，Kenneth致辭時引用咗內地電視劇《繁花》嘅台詞：「黃河路搭台，大家來唱戲，輪到了粉墨登場，演好了下台卸妝，流程都一樣，正所謂，唱戲不如聽戲好，上台終有下台時」。尚海龍就好認同呢段說話，話上台係偶然，下台係必然嘅，仲送上《繁花》一書畀Kenneth作為退休禮物。

衛碧瑤8月接任秘書長

另一選委界別議員吳傑莊同自由黨副主席李鎮強都祝Kenneth退休生活愉快，吳傑莊透露，Kenneth已安排退休後周遊列國，學習新事物，享受新生活。

接棒Kenneth嘅新一任秘書長衛碧瑤，原為立法會副秘書長，今年初獲委任嘅佢將於8月1日起正式接任。