【Emily】兩區60區議員 上周上海上堂 交流學習「基層治理」

【明報專訊】深水埗同元朗兩區共60名區議員上星期喺上海接受為期4日嘅培訓，日前返港。民政總署噚日喺facebook總結培訓成果，提到區議員同上海嘅基層治理人員交流，了解佢哋嘅經驗同埋案例，包括利用科技擴闊服務範圍、尋求社會資源支持政府項目等，學習點樣組織居民、發掘參與社區服務嘅人才。

區議會改制後，政府組織區議員去內地接受培訓，深水埗同元朗嘅區議員喺兩區民政專員兼區會主席帶團下率先北上上堂。今次培訓班獲國務院港澳辦、上海市政府同上海行政學院安排，一眾區議員同當地街道辦領導、政府服務單位負責人、社區自治組織主席交流，了解對方工作難題和經驗，例如與政府單位同居民組織嘅分工合作。

考察楊浦濱江 民署：取經轉型

培訓班一行亦到上海楊浦濱江考察，參觀「人民城市建設規劃展示館」，了解當地點樣由工業區活化，例如將肥皂廠改建成為網紅打卡咖啡店。民政總署提到，深水埗和元朗昔日同係工業區，楊浦濱江嘅發展同轉型有好高參考價值。