【Emily】民建聯印度會擺站 解答少數族裔回鄉證疑難

【明報專訊】非中國籍香港永久居民現可申請「港澳居民來往內地通行證（非中國籍）」（港人俗稱「回鄉證」）。為令多啲少數族裔市民更了解申請資格同流程，民建聯少數族裔委員會噚日喺佐敦印度會擺諮詢站，並即場幫約300個少數族裔市民解答問題及網上申請。

民建聯立法會議員李慧琼都有到場幫手，佢話有啲少數族裔港人唔太掌握申請要求，例如唔知道要先去入境處拎申請通知書先至可以去中旅社搞通行證。佢又話隨住粵港澳大灣區發展，外籍港人北上傾生意、投資、學術交流同旅遊嘅需求不斷增加；仲覺得新安排可以成為誘因，令周圍嘅人才、企業來港發展，意義重大。李慧琼又話會繼續推動兩地市民同商務旅客通關嘅措施，例如逐步恢復「一簽多行」同令商務簽證更便利。

印度協會主席毛漢話，𠵱家去內地有直通巴士，預計新安排可以令更多人每星期北上消費一兩次，「變相可以增加內地嘅生意，又可以理解多啲佢哋嘅文化」。