【Emily】河套行車橋 新方式整塊橋面吊裝

【明報專訊】建築技術不斷創新，土木工程拓展署嘅落馬洲河套地區發展第一期，就應用「全跨度橋樑吊裝方法」建造行車天橋，將重400噸嘅天橋橋面，成條吊上橋墩裝嵌，署方話用新方法可提升工地安全，仲因為可以一次過吊運一段橋面，減少對橋底下道路使用者嘅影響。

提升工地安全 減道路影響

落馬洲河套地區發展第一期，包括興建連接道路ST01以接駁落馬洲路至粉嶺公路/新田公路。呢條道路及天橋，承建商採用新建築法，早前做橋面接駁工程時，請埋立法會議員劉國勳去參觀。

以往建築天橋嘅做法，工程人員會將每件預製組件吊上裝嵌，新方法係，先喺附近空地將多件預製組件砌成一段橋面，然後用遙控嘅「自行式模塊運輸車」，將一段橋面運行去工程點，再用巨型吊機將橋面吊起接駁。議員劉國勳話，工程人員手持三維掃描儀，結合建築信息模擬嚟優化設計和輔助施工流程，佢話期待日後可以有更多創新技術，應用於發展工程。