【Emily】上載舉重片 何敬康：全力撐港隊

【明報專訊】巴黎奧運聽日（周五）開幕，一班港隊代表已先後抵達當地準備，新民黨立法會議員何敬康（Adrian）鍾意運動，接觸舉重已經踏入第七個年頭，佢噚日喺facebook上載受訓短片，見佢不斷失敗又受傷，最終都有成功，佢話，舉重帶來嘅挑戰、從挫折中學習，可以令人成長，佢話自己只係「一個小小運動員」都需要家人、朋友及同事支持，港隊運動員就更需要全港市民支持。

Adrian話去年因肩膀受傷而暫停訓練，正如每個世界級舉重運動員都喺不同傷患下受訓，「他們所經歷的我也身同感受（感同身受）」，所以令佢有多一份體會，亦令佢覺得無放棄嘅理由。

佢話運動員付出嘅努力、所作犧牲不足為外人道，部分人甚至放棄本身職業去實現夢想，而佢好明白香港運動員喺政策、政府層面都需要多啲支援，先可以全心全意投入訓練，為港隊出力，佢會全力支持奧運港隊。