【Emily】巴奧港將免費搭九巴一年 可為巴士命名 楊潤雄飛抵巴黎 領通行證好興奮

【明報專訊】巴黎奧運喺香港時間聽日凌晨揭幕，九巴噚日宣布，所有出戰巴奧嘅中國香港代表團成員可以免費搭九巴及龍運巴士一年，向一眾香港運動員表達支持。

代表團教練同醫療團隊都有份

今次港隊共派出35個運動員競逐13個項目。九巴話，獲贈一年免費乘搭九巴及龍運巴士嘅包括所有巴黎奧運香港代表團成員，除咗出戰嘅健兒，教練同醫療團隊都有份。另外，九巴又會向港隊運動員送出巴士命名權，每個港隊運動員可為一架九巴命名，載有命名內容同信息嘅名牌將會安裝喺巴士車廂裏面。

文化體育及旅遊局長楊潤雄噚日都已經飛咗去法國巴黎，直擊奧運，為一眾香港運動員打氣。佢噚日喺facebook開post話，到戴高樂機場嘅第一件事係「認證」，即係領取奧運會嘅通行證，又話喺機場接觸到唔少奧運義工，佢哋既友善又專業，過程順暢，「奧運盛事即將開始！」佢又upload咗張相，見到佢身穿港隊嘅淺藍色外套戰衣，手執通行證，笑得好開心，心情似乎好興奮。

楊潤雄仲話同運動員傾過，大家滿意住宿，而運動員房間有政府資助裝冷氣機，佢去過其中一間，話開咗冷氣感覺頗舒服。