【Emily】患病無法說話 美眾議員國會AI「發聲」

【明報專訊】美國眾議員Jennifer Wexton患上罕見病而失去講嘢能力，喺人工智能（AI）科技協助下，佢以AI重塑原聲喺美國國會發言，成為第一個以AI聲音發言嘅國會議員。

民主黨弗吉尼亞州議員Wexton喺美國時間禮拜四透過平板電腦，用AI程式「讀」出預先準備嘅演辭，向今個月「身心障礙驕傲月」致意。佢話自己雖然唔可以喺國會辯論，即席慷慨陳辭，但都有AI重塑聲音代佢發言。佢希望自己可以為有身心障礙嘅人發聲，「因為往往世人只係見到我哋嘅障礙，事實上，我哋遠遠不止於此（we are so much more）」。

Wexton舊年公布患上罕見嘅「進行性核上麻痺」（PSP），當時宣布今屆國會任期屆滿後唔尋求連任。佢早前已獲准以語音轉文字嘅程式喺國會發言。