【Emily】直通車永久停運 紅磡站設施用途待規劃

【明報專訊】有逾110年歷史嘅城際直通車將永久停運。直通車曾經係往來內地與紅磡嘅主要交通方式，但自從2018年高鐵通車後，直通車客量大跌，其後暫停營運。中國海關總署噚日喺公告話，即日起正式關閉位於北京西站、上海站、廣州東站及東莞常平站4個內地與香港城際直通車鐵路口岸，意味直通車完成歷史任務。現時直通車紅磡站原址舉行緊港鐵「站見」鐵路展，運輸及物流局回覆Emily話，原本紅磡火車站直通車嘅設施位置用途有待重新規劃。

運物局又話，上年高鐵香港段新增常平站同廣州東站等多個直達點，自此高鐵香港段已連接城際直通車覆蓋嘅所有站點。至於喺紅磡站嘅口岸設施，當局話有待重新規劃。港鐵亦回覆Emily，話知悉相關公告，而自從直通車受新冠疫情影響喺2020年1月起暫停服務，公司已調配相關同事至高鐵等工作崗位。

直通車停運，鐵路迷除咗關心紅磡站未來用途，亦關注以往行走兩地嘅ktt列車命運。翻查資料，城際直通車以往有行駛廣州東站、肇慶、北京西站同上海站等。其中廣九鐵路喺1911年全線通車，曾經喺二戰後長期暫停服務，到1979年先復運；滬九直通車同京九直通車就喺1997年5月開辦。