【Emily】保護海港協會登報做民調 發展局去信斥內容「誤導」

【明報專訊】維港嘅填海項目受《保護海港條例》限制，政府舊年提出修例建議「拆牆鬆綁」。自1995年成立嘅保護海港協會噚日喺多份報章登廣告做民調，邀請市民回答3條問題，包括係咪支持政府進行更多大規模填海，例如策劃中嘅青洲填海計劃。不過，發展局噚晚喺facebook反駁，話已去信協會斥廣告內容誤導，「協會指政府正策劃在青洲作大規模填海，這完全是子虛烏有」。

局方指「策劃青洲大型填海」子虛烏有

現時維港內大型填海項目倡議人需做「凌駕性公眾需要」測試，以推翻「不可填海推定」嘅約束，而政府提出修例，包括賦權特首會同行政會議決定是否信納嘅權力，以及減省小型填海嘅相關測試程序。

協會喺廣告話，政府嘅建議係由「政府自行決定」大規模填海計劃係咪合法，而唔係由法院決定，違背普通法嘅法治同自然正義嘅基本原則。協會又問市民係咪支持將維港列為「國家之寶」保護，以及係咪支持由獨立法院，監察政府大規模填海計劃。

發展局就話，協會嘅論據「完全偏離事實」，因為現行條例都無條款要求法院審批填海項目，只係有人提司法覆核申請，法院先審理。局方又話，早前提出修例時做咗數月嘅公眾參與活動，普遍意見贊同或不持異議。