【Emily】加拿分道×加連威老道交界 第二個對角行人過路處啟用

【明報專訊】繼今年1月沙田設立全港首個「對角行人過路處」，噚日尖沙嘴加拿分道與加連威老道交界路口嘅對角行人過路處都已完工，即時啟用。大家之後喺度過馬路就可以打斜行，慳番幾步同快些少。

至於沙田沙角街與逸泰街交界路口嘅試點，運輸署話至今整體運作順暢，今次尖沙嘴係第二個試點。署方話會繼續小心觀察兩個試點嘅運作情况，再制定適合香港交通情况嘅對角行人過路處設計標準。

試驗計劃透過喺上述兩個路口加設橫越路口中心嘅行人過路處，畀市民合法打斜過馬路。運輸署重申香港路口車流一般較繁忙，挑選試點時要小心研究路口特性，包括車流人流、過路距離同所需時間等因素，確保交通燈控制路口仍可維持足夠車流，避免對整體交通造成嚴重影響。