奧運羽毛球港隊返港　謝影雪稱無遺憾　鄧俊文：冇揀錯拍檔 (10:51)

香港羽毛球隊完成巴黎奧運賽事後今晨（4日）返抵香港。混雙組合的謝影雪賽前甩骱，她稱很感恩可完成奧運賽事，自己沒有留下遺憾，「做到賽前想做嘅嘢，就係享受呢個舞台，今次覺得發揮到自己應有嘅水平。」拍檔鄧俊文笑說「冇揀錯拍檔」，又說兩人會於8月及9月參加日本及香港的公開賽，未來發展仍未商討。

鄧俊文說，兩年前兩人發揮得不太好，當時謝影雪傷後復出，詢問鄧是否仍想「夾」，「佢未問我之前，我心入面都有答案，我直接同佢講，如果佢想繼續打，我一定係擺佢喺第一位」，之後兩人一條心爭取奧運積分，「𠵱家證明係冇揀錯（拍檔）」。他又說，完成奧運賽事後心態上會較放鬆，因之後不太需要在意排名，相信比賽時會「打得放啲」，希望享受每場比賽、每一分。

兩人亦感謝市民觀看直播為他們打氣，鄧俊文表示，會繼續努力，「盡量回報畀大家」。鄧又寄語隊友繼續努力，憶述自己首次參與奧運時亦是以獲得經驗為主，「結果無論滿意或唔滿意，其實佢哋條路仲好長……唔好放棄，快啲加把勁，奧運後繼續急起直追。」

談到未來發展，謝影雪提到以往很多前輩會「帶起」他們，雖然自己此刻未退役，但未來即使不在前線，都希望盡最大努力，協助其他年青運動員。