【Emily】全民運動日高官落場響應 特首與劍手鬥掟豆袋

【明報專訊】奧運熱潮持續，康文署噚日舉辦嘅「全民運動日2024」，以「日日運動半個鐘，健康快樂人輕鬆」為口號，免費開放轄下多項康樂設施畀市民使用，包括公眾游泳池、羽毛球場、籃球場、網球場等，並重點推廣部分奧運體育項目。適逢奧運金牌「家朗旻憓效應」，有體育館設劍擊體驗攤位，以膠劍教授基礎知識，大受歡迎。

特首李家超下晝去咗大埔東昌街體育館睇體育示範表演，並同劍擊運動員佘繕妡一齊比賽掟豆袋。佢喺facebook話，相信全港市民上星期見證咗香港運動員喺奧運嘅出色表現後，都能感受到運動帶來嘅魅力同激情，希望大家身體力行抽時間做運動，又提醒港人要繼續為國家隊同港隊運動員打氣。噚日唔少司局長官員都出動，去唔同地區參加體育活動。政務司長陳國基去咗沙田玩匹克球，副財政司長黃偉綸喺石塘嘴體育館玩足毽；商經局長丘應樺及署理運輸及物流局長廖振新就喺唔同場館玩劍擊體驗活動。

另外，AIA噚日免費開放摩天輪，向香港運動員致敬，吸引大批市民及遊客烈日下排隊等候乘坐。有市民大讚港隊運動員表現出色，仲多謝佢哋為香港付出。