【Emily】田二少加國度假 孫女助set頭 江玉歡遊西班牙 不忘關心港務

【明報專訊】唔少議員7至8月趁立法會休會去旅行，如實政圓桌議員田北辰（田二少）同家人去加拿大溫哥華度假，又湊吓孫女；選委界別議員江玉歡（Doreen）就去西班牙，其間不忘關心香港政務。

田北辰噚日喺facebook話最大嘅孫女細細個已鍾意幫佢搞「頭髮造型」，今次又有新靈感，Emily見田二少頭上豎起條辮仔，兩爺孫笑住自拍。不過，田二少話大孫女都已經10歲，遲多幾年孫女大個想見多一面都幾難，更需要珍惜目前所擁有，活在當下。

江讚巴塞隆拿政策張弛有度

Doreen就喺facebook提及上周喺巴塞隆拿時思考當地政策，從百幾年前拆舊城牆，擴充城市，到近代沙灘使用區嘅兩層建築規劃等，反映政策張弛有度，以及從政者遠見與勇氣對城市發展嘅重要。Doreen話近兩年港府修例頗多而快，都係一啲管制措施，其他有利市面及文化發展嘅反未有鬆手，反問係咪為咗達到KPI（關鍵績效指標）。佢話城市開放及持續發展，政策應該放鬆啲，形容似「搓麵粉做麵包」，搓麵粉用力過度，麵包會變得死實，政策係協助城市發展嘅工具，而非「緊箍咒」。