【Emily】灣仔海濱豎50仿古電街燈 最舊款1890年

【明報專訊】大家夜晚行路未必會抬頭留意街燈設計，港燈近日喺灣仔海濱長廊重置50支歷代不同設計嘅電街燈，共有8款，最早一款早於1890年使用。港燈董事總經理鄭祖瀛話，唔同年代嘅街燈設計反映到社會發展，例如早年設計較為古典，亦帶有浪漫色彩，二戰後香港開始工業化，街燈設計轉趨實用風格，線條比較簡單。

港燈早前應灣仔民政處邀請，聯同灣仔區青年社區建設委員會和海濱事務委員會一齊構建今次嘅項目，每晚6點至10點會亮燈，展覽至明年1月31日。

鄭祖瀛話，港燈以前喺灣仔嘅發電廠，位於現時日街、月街和星街位置，早期每支電街燈仲要由人手逐一開啟，到後來安裝咗定時開關系統，每日日落後8分鐘自動開啟，日出前15分鐘自動關閉，至1990年代更進一步，引入「光敏開關控制」。