經濟
松屋港首分店周六試業
【明報專訊】與吉野家、食其家齊名，被稱為「牛丼御三家」嘅松屋宣布攻港後，最新公布位於佐敦莊士倫敦廣場首間香港分店，將於本周六（8月10日）試業，8月11日正式開張（圖）。
相信大家都知道，日本松屋唔少分店都係24小時營業，不過香港分店就唔係呢回事。根據松屋facebook帖文，佐敦分店營業時間由早上7點至晚上10點半。另外，松屋香港同時公布招牌丼飯「牛肉飯」價錢，售價35元，但未知會唔會跟隨日本做法，提供小碗、標準、大盛、特盛等選擇，以及送麵鼓湯等。
招牌牛肉飯價錢與日本相若
以松屋香港分店「牛肉飯」定價而言，其實同日本分店大盛連稅630日圓差唔多，松屋就話準備好餐單之後就會同大家分享。唔少網民都留言話好期待，又希望食物質素可以保持日本水準，相信今次松屋開張都會吸引到唔少人去試下。
email: [email protected]
