【Emily】民建聯「政道」課程200多人報名 上屆學員兼副局：對各行業者都有啟發

【明報專訊】民建聯今年再舉辦「政道」治政理念研習課程，噚日邀請上屆舊生與傳媒茶敘。舊生、民記副秘書長葉文斌透露，目前已有逾200人報名，稱該黨向政府推薦人才時，學員表現係考慮因素之一。同場另一舊生副政制局長胡健民就話，報讀「政道」同加入政府唔一定掛鈎，但相信課程對各行業嘅人均有啟發。

今屆「政道」課程名額共50個，葉文斌話報名者背景多元，暫時統計非民建聯成員較多，部分人來自同鄉社團、商界等。佢話選拔學員時主要視乎履歷、面試表現等，不分建制或非建制派，強調課程與選舉無關。被問到會唔會推薦優秀學員加入政府，葉話課程旨在培訓管治人才，學員表現係佢哋推薦人才嘅考慮之一，又話學員上堂期間有機會同官員交流。

上屆「政道」2021年辦，有5名學員之後加入問責班子，胡健民係其中之一，佢表示，授課內容觸及不同範疇，能了解國情同國際局勢，認為不僅從政者，從事各行各業嘅人都有得着。不過，佢強調政府有唔同渠道吸納人才，能唔能夠加入政府亦取決個人經驗等因素。另一舊生、全國人大代表黃冰芬話，課程有助佢看清全局、「睇得闊啲」，認識當今國際形勢及一國兩制之下香港嘅角色。