【Emily】率團訪深圳 力銷營商好伙伴 林定國：港法律界可供最佳保障

【明報專訊】律政司長林定國同香港大律師公會、香港律師會等代表訪深圳，佢噚日喺一午宴活動致辭，話習近平主席經常都講「法治是營商的最好環境」，所以大家需要依賴法律建立商業合作關係、投資、規範權利和義務、管控風險、解決爭議。林定國話香港業界可以為深圳朋友們嘅發展提供最佳保障，大家合作可達至互惠共贏。

引習「法治是營商最好環境」

林定國噚日喺深圳出席律政司與香港貿易發展局合辦嘅法律會議，佢話，今年係《粵港澳大灣區發展規劃綱要》發布5周年，又提及去年4月習近平去廣東考察時，有清楚指示要使粵港澳大灣區成為新發展格局嘅戰略支點、高質量發展示範地、中國式現代化引領地。佢又話中央嘅三中全會《決定》，第27段特別提到香港要發揮「一國兩制」制度優勢，鞏固提升香港國際金融、航運、貿易中心地位，要深化粵港澳大灣區合作。林認為：「如何落實這些要求，是我們每一個人當前最重要的共同責任。」

林定國又表示，深圳係大灣區內與香港共同推進法治建設最密切嘅伙伴，亦係最能受惠於香港法律服務嘅地方，強烈鼓勵深圳嘅朋友用好各項先行先試推行嘅法律政策措施。