【Emily】愛隊訪港 要做嘢睇唔到 林振昇自稱真．馬體會球迷

【明報專訊】西甲球隊馬德里體育會訪港，噚晚同本地勁旅傑志較量。立法會議員林振昇噚日就喺社交媒體上載手持馬體會波衫嘅相，話自己係「真.馬體會」球迷。西甲球壇一直由皇家馬德里及巴塞隆拿雄霸，但馬體會能夠突圍，仲喺2014年奪得西甲冠軍，林振昇話佢就喺當年買咗手上呢件馬體會波衫，多年來都支持呢隊波。不過，佢同Emily講由於一早有工作安排，噚日無緣入場支持，有少少可惜。工聯會陸頌雄就三代同堂去咗大球場觀賽，表現興奮。

林振昇話，馬體會風格實而不華，唔算豪華班霸，無超級球星，但都有好成績，值得支持，特別係領隊施蒙尼表現出色。對於今次馬體會訪港陣中主力球星基沙文缺席，事件引起爭議，林振昇認為事件未至於去到上次球王美斯事件咁嚴重。佢亦期望香港能延續奧運氣氛，辦更多盛事，吸引各地遊客來港，從而帶動旅遊業。