【Emily】機場藝術節 好多打卡位

【明報專訊】機場客運大樓即日起至10月31日會舉辦「香港國際機場文化藝術節2024」，旅客會喺大樓唔同地方發現藝術裝置，包括離境大堂有本地著名畫家江啟明嘅20幾幅水彩畫，勾勒香港自然風貌。機場嘅大型數碼屏幕亦會展出由本地藝術家及260名中學生創作嘅4幅動態畫作。

文化藝術節設有4個展覽，涵蓋傳統工藝藝術以至數碼藝術，包括被列為香港非物質文化遺產嘅傳統手工技藝，例如竹蒸籠、手雕麻將嘅裝置。參觀者可睇到舊時香港招牌常用嘅「李漢港楷」字體印章，仲可以製作個人化香港街景明信片，亦可取得本地插畫家設計嘅限量版行李箱貼紙。

今次活動係機管局聯同M+博物館、康文署及本地藝廊等機構合辦。機管局話希望透過藝術節，豐富旅客途經機場嘅體驗。