【Emily】頻現身拜祭活動 顏汶羽變盂蘭達人

【明報專訊】按農曆計本周六係七月十四，地區上唔少團體已辦盂蘭勝會祭祀活動，立法會九龍東議員顏汶羽就變咗盂蘭達人，連日去咗3場拜祭活動，佢喺社交媒體出帖嘅相片，見佢每次都手持香燭、低頭上香。顏汶羽同Emily講，對潮州嚟講，盂蘭係大節，並預告未來幾日可能會去多幾場。

神功戲規模減 籲反思文化傳承

顏汶羽噚日去咗坪石邨、油塘嘅盂蘭勝會，前日就去彩霞邨。除咗參加「鬼節」活動，佢噚日去埋香港佛陀教育協會舉辦嘅「紀念孔子聖誕週年釋奠典禮」。顏汶羽話，其實10多年前，喺九龍東會有接近30場盂蘭勝會，今年只剩低不足一半，而且規矩縮減；仲話神功戲規模及舞台、設大型紮作亦愈來愈少，係時候反思盂蘭文化嘅傳承問題。

香港嘅潮籍人士有120多萬，各地區嘅旅港潮人均舉辦盂蘭勝會，從農曆七月初一起直至七月底，歷時一個月，至今有100多年歷史。盂蘭勝會係話用嚟祭祀祖先及陰曹無祀孤鬼，活動包括燒街衣、潮劇神功戲、化大士王、派平安米、福物競投等，香港潮人盂蘭勝會於2011年已被列入第三批國家級非遺代表性項目名錄。