【Emily】陳國基勉明Teen團 學江旻憓「香港精神」 譚志源貼杭州參觀相 江成「集郵對象」

【明報專訊】巴黎奧運女子重劍金牌得主江旻憓前日履新為馬會對外事務助理經理，同佢上司、公司事務執行總監譚志源隨「共創明Teen計劃」學習團到杭州考察。政務司長陳國基噚日亦北上杭州參與學習團活動，佢喺歡迎晚宴致辭時特別提到江旻憓喺奧運決賽比分一度落後1：7，但慢慢追回，最後「決一劍」反勝對手，鼓勵在場學員學習佢勇於拼搏、永不放棄嘅「香港精神」。

陳國基致辭時感謝馬會支持「共創明Teen計劃」，又提到江旻憓今屆奧運為港奪金，對佢喺賽後訪問話「唔想無打出香港精神就放棄」呢句話印象深刻。佢形容在場學員十分幸運，除來到美麗嘅杭州參觀，更有江旻憓陪伴，一眾學員一定可以喺江身上得到啟發。

陳又話江旻憓同其他香港運動員一樣勇於拼搏、永不放棄，值得在場學員學習，寄語佢哋珍惜「共創明Teen計劃」嘅學習機會，努力朝自己嘅目標進發。

譚志源噚日亦喺facebook發帖，貼出佢同江旻憓及一眾學員喺杭州參觀嘅相片，江成為集郵對象，而團友就去咗申昊科技同吉利汽車參觀，相中可見江參觀時非常專注，仲面露笑容同機械人互動。