【Emily】社恐蛻變 首女廚為港出戰世界技能大賽

【明報專訊】由世界技能組織主辦嘅「世界技能大賽」下月10日喺法國里昂開鑼，香港選手黃湘將出戰「西式烹調」項目，係第一個女廚師代表香港出戰。

生於湖南嘅黃湘，小一時來港讀書後暫託喺親戚屋企，養成內向嘅性格；中學畢業到西餐廳做廚師，先至堅定向廚藝發展嘅決心，於是報讀國際廚藝學院（ICI）文憑課程。佢話細個時寄人籬下，一度唔願返屋企，更唔擅長同人傾訴，自言係「社恐」，直到入讀ICI後，導師不時鼓勵佢參賽，先慢慢建立自信，今次更係佢第一次舉手參賽。

另一參賽者、雲端工程師溫嘉智將出戰「雲端運算」項目，而佢嘅老闆伍善正係上屆同一項目優異獎章得主。溫嘉智話自己遇問題時比較急躁，容易自亂陣腳影響比賽臨場表現，多得老闆用過來人身分分享點樣控制情緒同抗壓。

世界技能大賽每兩年舉辦一次，今屆就設59個項目，有70幾個國家或地區共約1400人參賽，其中香港代表隊有38人，將競逐33個項目。