【Emily】廉署實習生扮《無間道》 「真係好辛苦，我頂唔順」

【明報專訊】9個分別來自本港、內地同海外嘅大學生，上月頭開始喺廉署展開6星期實習，廉署facebook專頁噚日上載短片分享佢哋實習嘅點滴。廉署人員一般需接受20周入職培訓，實習生就有機會體驗3日「試煉版」入職特訓，包括學習點樣用伸縮棍同手銬等拉人、嘗試喺第三代錄影會面室向嫌疑人讀出警誡辭同錄口供、到模擬法庭了解準備審訊嘅程序。

條片亦有收錄實習生嘅「蝦碌」鏡頭，例如向嫌疑人讀出警誡辭時話「你唔一定要講嘢，無論你講啲乜嘢，我都會用筆記低」，之後就唔記得下一句；又有人練習為疑犯鎖手銬時「雞手鴨腳」，但最終都成功。

短片仲模仿港產片《無間道》兩個主角喺天台對話嘅情節，其中實習生、港大法律系Ben同長官講「真係好辛苦，我頂唔順啦！」鏡頭就切換成長官當初同佢面試時，佢話希望加入廉署打擊貪污，為社會出一分力；鏡頭此時返番天台，長官就同佢講：「少少嘢就話頂唔住，點加入廉署？」

眼見實習生嘅表現，廉署話副廉政專員及執行處首長丘樹春忍唔住落場親授反貪心得。條片仲預告將推出更多短片，睇下邊個實習生通過實習，獲得專員胡英明請飲咖啡。