【Emily】10年研萬種 港大製全球螞蟻地圖

【明報專訊】昆蟲佔地球上已描述物種逾五成半，但科學界對昆蟲地理分佈嘅整全資料唔多。港大理學院生物科學學院昆蟲生物多樣性與生物地理實驗室主任管納德，過去10幾年同國際研究團隊整理近1.6萬種螞蟻嘅分佈資料同過去300幾年與螞蟻相關嘅研究資料，製作出首張螞蟻嘅生物地理區域圖。

呢張生物地理區域圖用咗信息學同機器學習等技術，預測同分析螞蟻分佈，將螞蟻喺全球嘅領土劃分為九大生物地理領域。團隊將呢張地圖同脊椎動物及植物地圖對比，發現唔同生物嘅地理區域非常相似，但植物同螞蟻之間嘅生物地理聯繫，可能比與脊椎動物更緊密。管納德解釋，螞蟻同植物之間喺生態同進化有非常緊密嘅關係，例如螞蟻幫助多種植物傳播種子，並保護植物免受草食動物傷害，兩者共同演化數百萬年。

發現同植物演化關係緊密

港大理學院話，呢張生物地理區域圖由港大生態學家同日本伙伴合作，研究已喺國際學術期刊《自然通訊》發表，期望為理解昆蟲分佈提供「現今最佳視角」，相信有助於制定更有效嘅生態保護策略。