【Emily】明Teen團員交流 江旻憓感動落淚

【明報專訊】巴黎奧運女子重劍金牌得主江旻憓返港後加入馬會出任公司事務部對外事務助理經理，上任之後近日隨「共創明Teen計劃」學習團到杭州考察，噚日同學員交流時一度感觸落淚，其後佢解釋係受同團小朋友感動。

被問「幸福」論 話記者揀中間句

江旻憓見傳媒嗰陣，被問到話過「喺香港做運動員好幸福」，但𠵱家好多運動員拎7000元工資，係唔係覺得佢哋好幸福，佢即刻收起笑容話，「我有前面同埋後面，不過你哋淨係揀咗中間嗰句」。

江旻憓解釋，當時意思係自己好幸福，因為可以做自己鍾意嘅事、成為一個運動員，加上劍擊界前輩喺資源好少時攞到好成績，放棄同犧牲好多，先至令呢一代劍擊運動員有更多資源。佢希望所有運動員都有機會搵到自己熱愛、覺得值得堅持嘅事。睇番當時片段，江旻憓回應緊運動員支援係咪足夠，佢提及要多謝前輩嘅努力，令新一代有更多資源。

對於點樣看待負面意見、會唔會致謝保安局長鄧炳強為佢打氣等，佢強調希望建設更美好社會，記者再追問點睇網上負面意見，佢就面帶微笑聳肩同攤開雙手，身旁嘅上司譚志源就幫手回應「佢啱啱答咗你」。