經濟
途虎養車攻入柴灣 與鄰近車房「打擂台」
【明報專訊】內地品牌連環攻港掘金，汽車服務平台途虎養車（9690）繼今年第二季喺荃灣開設門市後，短短幾個月再攻入柴灣，喺柴灣工業城覓得舖位，同附近車房「打擂台」。同時，內地KTV品牌「魅KTV」首間香港分店將會進駐中環蘭桂坊，為香港夜生活唱首歌助興。
據途虎養車官網介紹，佢哋會為車主提供嘅產品同服務包括輪胎、底盤零部件、汽車保養、汽車維修、汽車美容、汽車配件以及其他相關安裝服務。小琴觀察柴灣門店，雖然未正式開張，但從外面睇到內部空間都幾寬敞，除咗有基本洗車同汽車維修設施外，亦設有一個好似客戶服務中心嘅玻璃房，睇嚟途虎準備喺香港大展拳腳。
內地品牌「魅KTV」插旗蘭桂坊
另一方面，內地KTV品牌「魅KTV」先聲奪人，宣布插旗香港。據市場消息指，「魅KTV」將會進駐「蘭桂坊之父」盛智文持有的中環蘭桂坊加州大廈全層，面積逾7000方呎，月租料約30萬元，預計簽下「3+3」租約，即3年死約及3年生約。「魅KTV」官網顯示，公司定位係結合酒吧、K歌包房、 私人影院、直播間一站式文化娛樂。另在內地營運分店舖已經有超過500間，而正在籌備分店就有142間。
