【Emily】7月392萬人訪港升一成 過夜客佔半 中秋夜灣仔再辦無人機表演

【明報專訊】 暑假係旅行旺季，旅發局噚日公布，7月初步訪港旅客數字為392萬人次，較舊年同期上升約一成，當中約半數係過夜客。至於未來幾個月嘅節日活動安排，旅發局就計劃下月中秋節正日夜晚（9月17日）喺灣仔舉行無人機表演；11月至12月嘅聖誕假期前後同除夕舉辦「香港繽紛冬日巡禮」煙火同無人機表演，以及「香港跨年倒數」煙花匯演。

旅發局話，今年1至7月累計錄得約2500萬人次旅客訪港，按年增52%，其中內地客佔約1930萬人次，佔總人次77.2%，非內地旅客錄得約580萬人次；內地與非內地旅客按年分別多47%及71%。

旅局：端午無人機表演滿意度9.2分

另外，旅發局今年5月起定期配合節慶或大型活動，舉行唔同主題嘅無人機或煙火表演。旅發局做咗問卷調查，以太平清醮同端午節無人機表演為例，以10分為滿分，受訪旅客嘅滿意度分別有9分及9.2分，起過九成受訪旅客認同活動提升訪港嘅體驗，逾95%嘅人話會推薦畀親友。