【Emily】內地4學者獲「未來科學大獎」

【明報專訊】由香港未來科學大獎基金會設立嘅「未來科學大獎」，噚日公布4位得主，全部嚟自內地；基金會亦公布將於10月30日至11月3日喺香港舉行「未來科學大獎周」，舉辦論壇同科學峰會等，2021年諾貝爾化學獎得主都會出席。創新科技及工業局長孫東喺發布會致辭話，香港有足夠條件舉辦更多大型且具影響力嘅國際科創盛事，促進國際科創交流。

獎項本身係獎勵喺內地、香港、澳門同台灣有傑出科學成果嘅科學家，不限國籍，今屆有4位內地學者獲頒3個未來科學大獎。「生命科學獎」得主係北京大學博雅講席教授鄧宏魁，佢開創以化學方法將「體細胞」重新編程為多能幹細胞，對再生醫學發展有深遠影響。

「物質科學獎」得主係中國科學院大連化學物理研究所研究員張濤同清華大學教授李亞棟，二人開發咗可設計、可控且具有普適性嘅單原子催化劑合成方法。「數學與計算機科學獎」由浙江大學數學高等研究院教授孫斌勇獲得，表揚佢喺「李群表示論」嘅貢獻。