【Emily】朝鮮擬年底開關供旅遊 內地旅社話各地人都可以去 除咗韓國

【明報專訊】旅行方式有好多種，有人鍾意吃喝玩樂輕鬆一下，亦有人鍾意去冷門地方「探秘」。因新冠疫情「封關」至今嘅朝鮮，近日有外媒引述兩間內地旅行社話，今年12月將會重新開放關口畀外國遊客，其中東北部嘅三池淵（白頭山地區）會先開放，不過朝鮮政府未有正式公布。

報道引述位於瀋陽嘅旅行社KTG Tours喺facebook話，旅客今年冬季可以前往三池淵，相信首都平壤以至其他地區將會喺不久將來開放。

北京嘅Koryo Tours喺網站表示，已收到朝鮮當地合作伙伴通知，今年12月將正式恢復三池淵嘅旅遊，其它地區都有可能恢復。

Koryo Tours同英國廣播公司（BBC）講，除咗韓國旅客外，其他地區嘅遊客都可以參加旅行團去朝鮮。