【Emily】卿姐孖徒弟參觀國安展 惹民主派討論 「一向覺得唔同立場都要睇」

【明報專訊】位於尖沙嘴歷史博物館嘅國家安全展覽早前開幕，唔少官員同建制人物都有去參觀。噚日民主黨前主席劉慧卿帶埋「徒弟」同年輕人去參觀，並將參觀相片上載社交網站，喺民主派圈內引起一陣討論。

卿姐同Emily解釋，話因為先前睇新聞見到國安展覽開幕，以前無類似展覽，而國安都要關心吓、知道吓，問咗徒弟後，佢哋都有興趣就一齊去。卿姐話，一向覺得唔同立場都要睇，例如以前建制派搞講座，佢都會去聽吓，亦繼續有自己嘅睇法，唔代表去背書。

已移英同退出民主黨嘅前黨友李永達就喺卿姐facebook留言力撐，「參觀這些展覽就等於改變立場？這種立論過分簡化」，認為參觀後都可以批判討論。

話徒弟有其觀察 「佢哋唔係傻」

至於展覽本身，卿姐就話部分展覽描述「有啲怪」，好似講到英國人過去對香港完全無貢獻，同埋無講到2019年反修例事件前因後果，及無講好多年輕人被捕未知會唔會被落案控告。卿姐話，佢都有同徒弟解釋民主派人物入獄或候判，徒弟都有自己觀察，形容「佢哋都唔係傻人」。