【Emily】載人測試7個月 錦綉兩自動駕駛穿梭巴月底啓航

【明報專訊】自動駕駛科技愈趨先進成熟，元朗錦綉花園喺本月底開始，會有兩架自動駕駛嘅穿梭小巴做載人測試，為期約7個月，接載居民穿梭屋苑，循環行駛2.5公里路程。兩架小巴嘅規格相同，其中一架可載12人，另一架因配備輪椅座，座位數目減到8個。

兩架車都安裝咗AI系統代替司機駕駛，架車行駛時，四邊車身共有15個雷達同識別鏡頭，會收集四周環境即時數據，配合高清電子地圖同埋圖像處理技術，AI系統能準確分析路面情况，精準定位。自動車系統並會運用5G技術，透過智慧燈柱喺雲端即時監控架車嘅所有狀况。

研發呢套系統嘅係生產力促進局旗下汽車科技研發中心，中心行政總裁張梓昌話，選定錦綉花園作載人測試，係因為呢個屋苑路面較闊，車流相對較少。

運輸署話，喺載人測試開始前已審視中心提交嘅資料同文件，包括內地同款車嘅測試報告，判斷適唔適合喺香港測試，兩架車亦要通過署方驗車中心檢驗。測試期間，小巴最高車速、測試路線同後備駕駛員資格都要受佢哋監管。運輸署話，連同錦綉呢次測試，香港會有8架自動車做測試，所用技術全部達到國際標準第4級別，睇齊內地以至世界各地。