【Emily】曾俊華倡熊貓BB叫熹熹智智 寓意港滿希望聰明伶俐

【明報專訊】大熊貓「盈盈」、「樂樂」嘅龍鳳胎上周出世，前財政司長曾俊華就拋磚引玉為佢哋改名，建議叫「熹熹」同「智智」，分別寓意香港前途光明希望，以及聰明伶俐。佢又話，相信海洋公園迎來新嘅大熊貓一定有助紓緩經營困難問題。

一對大熊貓BB仍未有名，曾俊華噚日喺facebook建議，女仔大熊貓可以叫做「熹熹」，寓意不論現况如何，香港前途都會繼續光明、充滿希望；男仔大熊貓可以命名「智智」，代表聰明伶俐、有智慧，並好似其身上顏色咁能夠分辨黑白。

曾俊華話，上周四心血來潮去海洋公園，打算探望「盈盈」、「樂樂」，到熊貓館先發現閉館，唔知咩事，當時大感失望，不過，當晚政府公布一對大熊貓誕下龍鳳胎，佢即刻轉悲為喜。曾俊華話將來海洋公園將有6隻大熊貓，形容好有睇頭，特別熊貓BB會有好大吸引力，相信會幫到一直面對經營困難嘅海洋公園。