【Emily】話歷史未得應有重視保護 新社聯倡離島建抗戰史旅遊線

【明報專訊】新界社團聯會同「原港九獨立大隊大嶼山中隊後人尋蹤小組」噚日開記者會，倡議喺離島有系統咁保育香港抗戰歷史蹤迹，例如建立紀念廳、立牌匾同碑記，同埋連接長洲、梅窩、塘福、東涌、寶蓮禪寺、大澳等，建立一條抗戰歷史旅遊路線等。

新社聯理事長譚鎮國話，香港離島喺抗日戰爭嘅戰略地位非常重要，例如游擊隊參與過「秘密大營救」、東江縱隊港九大隊大嶼山中隊就阻斷日軍利用香港作為通往廣州作後援補給基地嘅作用等，香港離島當年係廣州以至華南地區嘅重要防線，但遺憾呢段歷史未得到應有嘅重視同保護。

新社聯同原港九獨立大隊大嶼山中隊後人尋蹤小組向港府及社會各界提出5項倡議，包括喺長洲設立秘密大營救紀念廳，展示長洲喺營救文化界知名人士、愛國民主人士，作為起點及跳板嘅重要作用同意義；第二個倡議係喺日軍火燒牛牯塱舊址、梅窩銀礦灣、大澳展開反擊戰舊址等地方豎立碑記或牌匾，記下事件經過及犧牲者姓名。

倡設大營救紀念廳豎紀念碑

另外3項倡議包括喺昂坪寶蓮禪寺豎紀念碑，紀念出家人抗戰事蹟同大嶼山中隊抗戰歷史；修復大嶼山塘福小城牆，製作碑記，記述大嶼山中隊成立歷史；以及建立抗戰歷史旅遊路線，培訓導賞員，鼓勵學校組團參觀。