【Emily】北大嶼感染控制中心將拆 團隊回顧保養「摸石頭過河」

【明報專訊】利用組裝合成建築法興建嘅北大嶼山醫院香港感染控制中心即將拆卸，中心過去幾年經歷風風雨雨，全靠管理團隊悉心保養。北大嶼山醫院設施管理部屋宇裝備督察冼兆源（源哥）話，由於中心只用咗約4個月興建，快過傳統醫院，所以日常維修保養唔可以完全參照以往，例如要解決潮濕問題。

瑪嘉烈醫院同北大嶼山醫院嘅facebook專頁近日回顧營運中心嘅點滴，其中源哥話由於中心興建方法同傳統醫院唔一樣，維修保養要「摸住石頭過河」，佢舉例，組裝合成嘅隔熱保溫設計會引致病房內部容易產生濕氣，新冠疫情高峰時，唔可以清空病房維修，所以團隊決定先用抽濕機紓緩潮濕，再同病房同事配合，安排逐個病格「執漏」。

醫管局喺第五波疫情期間接收大量病人，當醫院隔離病牀爆滿之後，就動用中心病房照顧輕症病人。疫情後中心亦曾作為檢疫設施，接收猴痘病人嘅密切接觸者等。